“கேணி” இலக்கிய சந்திப்பு

எழுத்தாளர் ஞாநியின் புது வீட்டின் பின்னால் அழகான கிணறும் தோட்டமும் உள்ளது என்று நண்பர் பாஸ்கர் சக்தி சொன்னார். ஞாநியும் பாஸ்கரும் பேசிக்கொண்டிருக்கையில் இலக்கிய கூட்டங்களைப் பற்றி பேசியிருக்கிறார்கள். அந்தக் கிணற்றடி இருவருக்கும் நண்பர்கள் சந்தித்து பேசும் வெளியாக பயன்படுத்தலாமே என்று தோன்றியது. அந்த எண்ணத்தை தீவிரப்படுத்தி “கேணி” என்ற இலக்கிய சந்திப்பு அமைப்பை ஞாநி உருவாக்கினார்.

நல்ல சிறுகதைகளை, நாவல்களை, கவிதைகளை, கட்டுரைகளைப் பற்றி உரையாடலாம். வாசிக்கும் பழக்கத்தையும் பகிர்ந்துகொள்ளும் பழக்கத்தையும் இளைய தலைமுறை நண்பர்களுக்கு ஊக்குவிக்கலாம் என்ற அடிப்படையில் ‘கேணி’ ஒவ்வொரு மாதமும் இரண்டாம் ஞாயிறு மாலை 4.30 மணிக்கு துவங்கி 6.30 வரை ஒரு படைப்பாளியோ, வாசகரோ இலக்கியம் தொடர்பான விதயங்களைப் பேச வைக்கலாம் என்று முடிவு செய்யப்பட்டது..

இதன் முதல் கூட்டத்தில் எழுத்தாளர் எஸ்.ராமகிருஷ்ணன், “எனக்கு பிடித்த சிறுகதைகள்” என்ற தலைப்பில் பேச அழைக்கப்பட்டிருந்தார்.

14.06.09 தேதி ஞாயிறு மாலை 4.30 மணிக்கு ஞாநியின் கே.கே.நகர் வீடு இளைஞர்களால் நிரம்பி வழிந்தது. ஞாநியும் பாஸ்கரும் கேணிக்கு ஏதோ இருபது அல்லது அதிகபட்சம் முப்பதி பேர் வருவார்கள் என்று அவதானித்திருந்தார்கள். ஆனால் வந்தவர்களின் எண்ணிக்கை அறுபதை தாண்டியது. பேசுபவர் பேசினால் கேட்பவர்களின் கூட்டம் அதிகமாகத்தானே இருக்கும்? தீரா உரையாடலின் சொந்தக்காரர் என்று ஞாநியால் புகழப்படும் எஸ்.ரா கம்பீரமான குரலில் பேச்சை ஆரம்பித்தார். வெகு சுவாரஸ்யமான அவரின் பேச்சை நாளெல்லாம் கேட்டுக் கொண்டே இருக்கலாம். ரஷ்ய எழுத்தாளர் லெர்மர்தேவினுடைய கதையில் வரும் சம்பவமொன்று, எம்.டி.வாசுதேவன் நாயரின் ‘வானப்ரஸ்தம்’, புதுமைப்பித்தனின் ‘துன்பக் கேணி’ எனும் கதை, வைக்கம் முகமது பஷீரின் ‘மந்திரப் பூனை’ மற்றும் ப்ரெஞ்ச் கதையொன்று என தன்னை பாதித்த ஐந்து கதைகளைச் சொன்னார். ஏற்ற இறக்கங்களுடனும் அனாயசமான பேச்சுத் திறனாலும் அவர் சொல்லிக் கொண்டிருக்க மந்திரத்தால் கட்டிப்போடப்பட்டது போல அனைவரும் எதையும் தவற விடக்கூடாத கவனத்துடன் கேட்டுக் கொண்டிருந்தோம்.

அவர் பேசியதிலிருந்து என் நினைவில் நின்றவை:

“நாம் யாரும் கதை தெரியாதவர்கள் இல்லை.
எது கதை? அதை கதையென்று ஏன் சொல்கிறோம். ஒரு வசதிக்காகத்தான். வாழ்க்கையை வெவ்வேறு விதமாக எப்படி நாம் பார்க்கிறோம் என்பதை அது கற்றுத் தருகிறது. உலகின் தலைசிறந்த கதையை அளக்க இலக்கணம் எதேனும் இருக்கிறதா? நல்ல கதையை அளப்பது எது? அதற்கான ஸ்கேல் என்னவாக இருக்கும். என்னைப் பொறுத்தவரையில் அது வாழ்க்கையைப் பற்றிய உண்மைத் தன்மையை சொல்வதுதான். True to life - நேரடியான உண்மை. அந்த உன்மையை எப்படி சொல்வது. எழுத்தாளரின் சொந்த பார்வை. அந்த உண்மையை எப்படி சொல்கிறான் அதன் பின் அதை சொல்லக் கூடிய டோன்,. கதை சொல்லும் போது வறட்டுத்தனமான குரலில் அல்லாமல் எப்படி சொல்வது என்பது முக்கியம். அதிகாரம் அநாவசியம்.

வாசிப்பவன் சொந்த வாழ்க்கையில் கூட துயருற்று கண்ணீர் விட்டிருக்க மாட்டார்கள். ஆனால் கதையில் வந்த மனிதனின் துயர் தாங்க முடியாமல் சிலர் அழுவார்கள். சில கதாபாத்திரங்களின் பெயரை தங்கள் குழந்தைகளுக்கு பெயராக கூட வைத்திருப்பதை நான் பார்த்திருக்கிறேன். சில கதைகளை வாசித்து நானும் பல நாள் இரவு தூக்கத்தை இழந்திருக்கிறேன்.

கதைக்கு என்ன மாதிரியான முடிவு என்பது முக்கியம். எந்த மொழியானாலும். நேராக சொல்லும் போது குரல் வழியாக சொல்ல முடிகிறது. சொற்களை உச்சரிக்கிறோம்.

சிறுகதையில் உரையாடல் எழுதுவது சுலபம். மெளனத்தை எழுதுவது தான் கஷ்டம்.

நம்மில் பெரும்பான்மையினர் யாரிடமோ எதுவோ சொல்ல நினைத்து சொல்லாமல் விடுக்கிறோம். ஆத்மார்த்த அன்பினைக் கூட பகிர முடியாதவர்களாகிப் போகிறோம்”

எஸ்.ரா பேசிக்கொண்டிருந்த போது லேசான தூறல் போட ஆரம்பித்திருந்தது. அவரின் பேச்சுக்குக் கட்டுப்பட்டிருந்த அச்சிறு கூட்டம் அதை பொருட்படுத்தாது அப்படியே கேணிக்கருகில் அமர்ந்திருந்தது. செவிக்கு உணவில்லாத போது சிறுது வயிற்றுக்கும் ஈயப்படும் ஆனால் செவிக்கும் வயிற்றுக்கும் சேர்த்து அழகான தொன்னையில் கொண்டைக் கடலைச் சுண்டலும் அதன் பின் டீயும் தரப்பட்டது. சுண்டலை சாப்பிட்டுக் கொண்டே கூட்டத்தினர் மேலும் மேலும் எஸ்.ராவிடம் கேள்விகள் கேட்டுக் கொண்டிருந்தார்கள். சளைக்காமல் எல்லாக் கேள்விகளுக்கும் அவர் பதில் அளித்தார்.

கதை கேட்டல் என்பது எவ்வளவு அற்புதமான விதயம் என்று பல நாள் கழித்து உணர்ந்தேன். சரளமான அவரின் பேச்சு, இயல்பான நகைச்சுவையுணர்வு, தெளிவான உச்சரிப்பு என்று கேட்பவரைக் பிரமிக்க வைத்துவிட்டார். கதை சொல்லல் என்பது ஏன் அருகிப் போய்விட்டது. நம் குழந்தைகளுக்கு யார் கதை சொல்லி அவர்களின் அந்த ஆர்வத்தை வளர்ப்பார்கள். நாம் தான் தொடங்க வேண்டும் என்றார் எஸ்.ரா. சின்னஞ்சிறு கதைகள் இன்றைய வாசிப்பு சூழலில் மிகவும் தேவை என்றார். Fables வகைப்படும் கதைகள் வாசிக்க எளிமையும் கருத்தாழமும் கொண்டதாக இருக்கும் என்றார். அது போல தமிழில் எழுதப்படவேண்டும் என்றார். எஸ்.ராமகிருஷ்ணன் இத்தகைய உயரத்தை அடைய அவரின் உழைப்பும், தேடலும், மொழித்திறனும், மொழியின் மீதுள்ள தீராக் காதலும் என்பதை நேரடியாக கண்டுணர்ந்தேன்.


அவர் அடிக்கடி சுட்டிக்காட்டும் எழுத்தாளர்கள் புதுமைப்பித்தன், கோணங்கி, டால்ஸ்டாய். சமகால எழுத்தாளர்கள் சிலர் நம்பிக்கை அளித்துக் கொண்டிருந்த ஜே.பி.சாணக்கியா, சந்திரா போன்றவர்கள் காணாமல் போன சோகத்தை பகிர்ந்து கொண்டார் எஸ்.ரா. என்னுடைய நண்பர்களான இவ்விருவரும் எங்கும் போகவில்லை எழுதுவதை தற்காலிகமாய் நிறுத்தியிருந்தார்கள், வேறு என்ன செய்து கொண்டிருந்தாலும் எழுத்து இவர்களை ஈர்த்துக் கொண்டேயிருந்ததால் மீண்டும் புதிய விசையுடனும் உத்வேகத்துடனும் எழுத ஆரம்பித்துவிட்டார்கள்.

கேணி இலக்கியச் சந்திப்பில் பேசி முடித்தப் பின் கட்டாயம் வாசிக்கபட வேண்டிய தமிழ்சிறுகதைகளாக நூறு கதைகளை எஸ்.ராமகிருஷ்ணன் இளம் வாசகர்களுக்காக பட்டியலிட்டுத் தந்துள்ளார். அந்த பட்டியல் அவரின் ப்ளாக்கிலும் உள்ளது. அவை

நூறு சிறந்த சிறுகதைகள்
1. காஞ்சனை - புதுமைபித்தன்

2. கடவுளும் கந்தசாமி பிள்ளையும்- புதுமைபித்தன்

3. செல்லம்மாள் - புதுமைபித்தன்

4. அழியாச்சுடர் -மௌனி

5. பிரபஞ்ச கானம் - மௌனி

6. விடியுமா - கு.ப.ரா

7. கனகாம்பரம் -கு.ப.ரா

8. நட்சத்திர குழந்தைகள் -பி. எஸ். ராமையா

9. ஞானப்பால் - பிச்சமூர்த்தி

10. பஞ்சத்து ஆண்டி - தி.ஜானகிராமன்

11. பாயசம் - தி.ஜானகிராமன்

12. ராஜா வந்திருக்கிறார் - கு. அழகிரிசாமி

13. அன்பளிப்பு - கு. அழகிரிசாமி

14. இருவர் கண்ட ஒரே கனவு ? கு. அழகிரிசாமி

15. கோமதி - கி. ராஜநாராயணன்

16. கன்னிமை - கி.ராஜநாராயணன்

17. கதவு. கி.ராஜநாராயணன்

18. பிரசாதம் -சுந்தர ராமசாமி

19. ரத்னாபாயின் ஆங்கிலம் -சுந்தர ராமசாமி

20. விகாசம் - சுந்தர ராமசாமி

21. பச்சை கனவு -லா.ச.ராமாமிருதம்

22. பாற்கடல் -லா.ச.ராமாமிருதம்

23. ஒரு ராத்தல் இறைச்சி - நகுலன்

24. புலிக்கலைஞன் -அசோகமித்ரன்

25. காலமும் ஐந்து குழந்தைகளும் - அசோகமித்ரன்

26. பிரயாணம் - அசோகமித்ரன்

27. குருபீடம் - ஜெயகாந்தன்

28. முன்நிலவும் பின்பனியும் - ஜெயகாந்தன்

29. அக்னிபிரவேசம் -ஜெயகாந்தன்

30. தாலியில் பூச்சூடியவர்கள் - பா.ஜெயபிரகாசம்

31. காடன் கண்டது - பிரமீள்

32. உயரமாக சிவப்பா மீசை வைக்காமல் - ஆதவன்

33. ஒரு அறையில் இரண்டு நாற்காலிகள் - ஆதவன்

34. பைத்தியக்கார பிள்ளை - எம்.வி. வெங்கட்ராம்

35. மகாராஜாவின் ரயில்வண்டி - அ. முத்துலிங்கம்

36. நீர்மை - ந.முத்துசாமி

37. அம்மா ஒரு கொலை செய்தாள் - அம்பை

38. காட்டிலே ஒரு மான் -அம்பை

39. எஸ்தர் - வண்ணநிலவன்40. மிருகம் - வண்ணநிலவன்

41. பலாப்பழம் - வண்ணநிலவன்

42. சாமியார் ஜ?97;ிற்கு போகிறார் - சம்பத்

43. புற்றில் உறையும் பாம்புகள் - ராஜேந்திரசோழன்

44. தனுமை - வண்ணதாசன்

45. நிலை - வண்ணதாசன்46. நாயனம் - ஆ.மாதவன்

47. நகரம் -சுஜாதா

48. பிலிமோஸ்தவ் -சுஜாதா

49. தக்கையின் மீது நான்கு கண்கள் - சா.கந்தசாமி

50. டெரிலின் சர்ட்டும் எட்டு முழு வேஷ்டி அணிந்த மனிதர் - ஜி. நாகராஜன் 51. ஒடிய கால்கள் - ஜி.நாகராஜன்

52. தங்க ஒரு - கிருஷ்ணன் நம்பி

53. மருமகள்வாக்கு - கிருஷ்ணன் நம்பி

54. ரீதி - பூமணி55. இந்நாட்டு மன்னர் - நாஞ்சில் நாடன்

56. அப்பாவின் வேஷ்டி - பிரபஞ்சன்

57. மரி எனும் ஆட்டுக்குட்டி - பிரபஞ்சன்

58. சோகவனம்- சோ.தர்மன்

59. இறகுகளும் பாறைகளும் -மாலன்

60. ஒரு கப் காப்பி - இந்திரா பார்த்தசாரதி

61. முங்கில் குருத்து - திலீப்குமார்

62. கடிதம் - திலீப்குமார்

63. மறைந்து திரியும் கிழவன் - சுரேஷ்குமார இந்திரஜித்

64. சாசனம் - கந்தர்வன்

65. மேபல் -தஞ்சை பிரகாஷ்

66. அரசனின் வருகை - உமா வரதராஜன்

67. நுகம் - எக்பர்ட் சச்சிதானந்தம்

68. முள் - சாரு நிவேதிதா

69. ஒவ்வொரு ராஜகுமாரிக்குள்ளும் - சுப்ரபாரதி மணியன்

70. வனம்மாள் -அழகிய பெரியவன்

71. கனவுக்கதை - சார்வாகன்

72. ஆண்மை - எஸ்பொ.

73. நீக்கல்கள் - சாந்தன்

74. மூன்று நகரங்களின் கதை -கலாமோகன்

75. அந்நியர்கள் - சூடாமணி

76. சித்தி - மா. அரங்கநாதன்.

77. புயல் - கோபி கிருஷ்ணன்

78. மதினிமார்கள் கதை - கோணங்கி

79. கறுப்பு ரயில் - கோணங்கி

80. வெயிலோடு போயி - தமிழ்செல்வன்

81. பத்மவியூகம் - ஜெயமோகன்

82. பாடலிபுத்திரம் - ஜெயமோகன்

83. ராஜன் மகள் - பா.வெங்கடேசன்

84. தாவரங்களின் உரையாடல் - எஸ்.ராமகிருஷ்ணன்

85. புலிக்கட்டம் - எஸ்.ராமகிருஷ்ணன்

86. இருளப்பசாமியும் 21 ஆட்டுகிடாய்களும் -வேல.ராமமூர்த்தி

87. ஒரு திருணையின் பூர்வீகம் -சுயம்புலிங்கம்

88. விளிம்பின் காலம் - பாவண்ணன்.

89. காசி - பாதசாரி

90. சிறுமி கொண்டு வந்த மலர் - விமாலதித்த மாமல்லன்

91. மூன்று பெர்நார்கள் - பிரேம் ரமேஷ்

92. மரப்பாச்சி - உமா மகேஸ்வரி

93. வேட்டை - யூமா வாசுகி

94. நீர்விளையாட்டு - பெருமாள் முருகன்

95. அழகர்சாமியின் குதிரை - பாஸ்கர் சக்தி

96. கண்ணியத்தின் காவலர்கள் - திசேரா

97. ஹார்மோனியம் - செழியன்

98. தம்பி - கௌதம சித்தார்த்தன்

99. ஆண்களின் படித்துறை. ஜே.பி.சாணக்யா

100. பூனைகள் இல்லாத வீடு - சந்திரா

இது போன்ற கூட்டங்களுக்குச் சென்று விட்டு வீடு திரும்புகையில் மனம் முழுவதும் கேள்விகளாலும், புது புது திட்டங்களாலும் நிறைந்துவிடும். அந்த எழுத்தாளரின் ஆளுமையை மனம் அசை போட்டபடி இருக்கும். அவரை பேசுபவராகவும் நம்மை கேட்டுக் கொண்டிருப்பவராகவும் எது நிறுத்தியுள்ளது என்று தீவிரமாக யோசிக்க வைக்கும். ஞாயிறு கேணிக் கூட்டமும் அதையெல்லாம் நினைவிற்கு கொண்டு வந்தது. வழமை போலவே முடிவு செய்தேன் - நிறைய எழுத வேண்டும் நிறைவாய் எழுதவேண்டும்.